“Чингис хаан” Олон улсын нисэх буудлын олон улсын ирэгчийн танхимын “А” дугаартай туузан дамжуургын төхөөрөмжийг өргөтгөн 2023 оны 05 дугаар сарын 30-ны өдөр ашиглалтад оруулсан. Тухайн өдрөөс “B” дугаартай хоёр дах туузан дамжуургын төхөөрөмжийн өргөтгөлийн ажлыг эхлүүлэн төлөвлөсөн хугацаанд амжилттай гүйцэтгэж, 2023 дугаар 06 сарын 08-ны өдрийн 13:00 цагт буусан “Жэжү эйр”-ийн Инчеон-Улаанбаатар чиглэлийн нислэгээс эхлэн ашиглалтад орууллаа.

Ийнхүү ачаа тээшний туузан дамжуургын хоёр төхөөрөмжийг 36 метр байснаас 60 метр хүртэл буюу 1,5 дахин өргөтгөснөөр өргөн биет агаарын хөлгийг нэг туузан дамжуурга дээр хүлээн авч, нэг дор олон тооны ачаа тээшийг богино хугацаанд хүлээн авах давуу талтай болж байгаа юм. Мөн тус туузан дамжуургын төхөөрөмжний дээд талд нислэгийн чиглэл, аялалын дугаарын мэдээлэл бүхий дэлгэцийг байршуулан зорчигч үйлчлүүлэгчид ачаа тээшээ авахад хялбар болголоо.

Цаашид “Чингис хаан” Олон улсын нисэх буудлын хамт олон Монгол Улсын Засгийн газрын 228 дугаар тогтоолын хэрэгжилтийг хангах, нисэх буудлын хүчин чадлаас шалтгаалсан бөөгнөрлийг сааруулах, нисэх буудлаар үйлчлүүлэх зорчигч үйлчлүүлэгчдийн тав тухыг хангахын тулд барилгын өргөтгөлийн ажлуудыг төлөвлөсөн  хугацаанд нь гүйцэтгэж, бүрэн ашиглалтад оруулахаар ажиллаж байна.